Kandidat #45 • Voto 116
Hekuran Gashi
Lëvizja Vetëvendosje!
"Mos lësho pe!"
Lëvizja Vetëvendosje!
"Mos lësho pe!"
Rochester Institute of Technology - Ekonomi & Politika Publike
Master në Analitikë të të Dhënave (në përfundim)
Drejtor i Departamentit të Politikave Makroekonomike - Ministria e Financave
I lindur: 6 Tetor 1988
Nga Prishtina
Hekuran Gashi, i lindur me 6 Tetor 1988, është ekonomist nga Prishtina dhe aktualisht shërben si Drejtor i Departamentit të Politikave Makroekonomike në Ministrinë e Financave, Punës dhe Transfereve. Në këtë rol kyç, ai është i përfshirë në hartimin e politikave makroekonomike, në koordinimin ndërinstitucional dhe në mbështetjen e proceseve të zhvillimit ekonomik afatgjatë. Përmes angazhimit të tij profesional, ai kontribuon në forcimin e stabilitetit fiskal dhe orientimin strategjik të zhvillimit të qëndrueshëm të vendit.
Karriera e tij është ndërtuar mbi një eksperiencë të gjerë në sektorin privat dhe publik. Para përfshirjes në Qeveri, Hekurani ka udhëhequr për afro një dekadë operacionet dhe financat në sektorin privat, si dhe ka ofruar konsulencë financiare dhe menaxheriale për dhjetëra biznese nga industri të ndryshme. Ai ka punuar gjithashtu në Deloitte si analist në këshillime financiare dhe në ProCredit Bank si auditor i brendshëm, ku ka zhvilluar ekspertizë të thellë në analiza financiare, kontroll të brendshëm dhe vlerësim rreziku.
Në aspektin akademik, Hekurani ka përfunduar studimet themelore në ekonomi dhe politika publike në Rochester Institute of Technology, ku ka diplomuar me rezultate të larta. Aktualisht, ai është në përfundim të nivelit Master të Shkencave në Analitikë të të Dhënave, në të njëjtin institucion, duke thelluar njëkohësisht njohuritë në modelim, statistika dhe analiza të avancuara — kompetenca që i ndërthur me përvojën profesionale në hartimin e politikave.
Në qendër të vlerave të tij qëndron edhe prejardhja familjare — një familje me traditë patriotike dhe intelektuale, e njohur për kontributin dhe sakrificën ndër katër breza. Kjo trashëgimi ka ushqyer tek ai ndjenjën e përgjegjësisë, përkushtimin ndaj shoqërisë dhe angazhimin për një Kosovë më të drejtë e më të zhvilluar.
Angazhime që do të realizohen pa lëshuar pe
Ky program u mundëson prodhuesve të marrin kredi pa hipotekë, sepse shteti garanton për ta. Kur shteti jep garanci me para nga fondi, normat e interesit ulen ndjeshëm dhe financimi bëhet më i lehtë e më i lirë. Madhësia e fondit është 1 miliardë euro.
TVSH-ja nuk do të paguhet më në doganë në momentin e hyrjes së mallrave, por deri më datën 20 të muajit pasues. Kjo u lejon kompanive importuese tregtare ta shtyjnë pagesën e TVSH-së për muajin tjetër, duke përmirësuar ndjeshëm likuiditetin e tyre.
Heqja e taksës doganore prej 10% ul direkt koston e importit të veturave. Në të njëjtën kohë, thjeshtimi i kritereve të origjinës e bën procesin më të lehtë dhe më të shpejtë për importuesit.
"Dritarja për Investime të Diasporës" do t'u ofrojë bashkatdhetarëve një kanal të dedikuar për të investuar më lehtë në Kosovë, me mbështetje deri në 100 milionë euro. Kjo u mundëson bizneseve të diasporës financim dhe përkrahje konkrete për projekte të reja investuese në vend.
Me digjitalizimin e sistemit tatimor dhe kalimin në e-fatura, bizneset nuk do të kenë më nevojë të blejnë printera apo arka fiskale, të cilat janë të shtrenjta dhe kërkojnë pagesa të vazhdueshme mirëmbajtjeje çdo vit. Sistemi i ri digjital e zëvendëson këtë pajisje të kushtueshme me një platformë të thjeshtë dhe moderne.
Integrimi i Kosovës në SEPA do të thotë që dërgimi i parave nga jashtë bëhet shumë më i lirë dhe më i shpejtë. Me heqjen e tarifave të larta të bankave, bashkatdhetarët tanë do të kursejnë miliona euro çdo vit kur dërgojnë para në Kosovë.
Do të investohen deri në 500 milionë euro për infrastrukturë rrugore, akomodime moderne, pista të reja dhe një rrjet bashkëkohor të teleferikut. Qëllimi është që Brezovica të bëhet destinacion i njohur jo vetëm në rajon, por edhe në Evropë.